分享一件地上最強嘅禮物。
話說我女朋友生日，好大壇嘢，萬一預備得唔好真係手都分得。不過諗禮物真係好苦惱，頭都爆晒都唔知送乜好，有位朋友就提議：「所謂心思，就係做啲你最唔擅長嘅嘢囉！」
真係好Inspiring，我即刻有Idea。
9秒9仆去文具店，買咗張大畫紙，加幾盒木顏色⋯⋯我要親手畫幅畫！！！
開咗好多張相出嚟，憑住我對藝術嘅觸覺，一筆一筆咁描繪得猶如Print出嚟一樣，仲有少少畢加索Feel⋯⋯圖中就係我其中一幅傑作，左邊係原圖，右邊係成品啦當然⋯⋯
收筆嗰刻，我真係諗個朋友係咪害緊我，我望一望身邊隻貓，佢都對我呢幅「希特拉貓」好不屑咁款。（呢張只係其中一張⋯⋯最好一張⋯⋯）
到咗夜晚，女朋友問：「你預備咗咩送畀我？」我即刻心都虛晒⋯⋯「有⋯一陣畀妳，一陣畀妳⋯⋯」
但醜婦終須見家翁，我戰戰兢兢咁拎張畫出嚟，等緊佢一巴打落我度，再即場撕畫走人⋯⋯
點知，佢好開心咁，爆笑咗出嚟話：「好得意呀！」之後仲叫我逐張逐張開返原圖出嚟，一齊笑住睇。
我當堂自信返晒嚟，真係畢加索上身，同佢分析我嘅畫風。
「呢份係我收過最好嘅畫。」
女人真係好難捉摸，但故事教訓大家，只係要親手整、親手寫、親手畫嘅禮物，一定冇得輸，就算幾醜都好⋯你落咗心機，女朋友都會識得欣賞。
下次不妨參考我朋友嘅意見－所謂心思，就係做啲你最唔擅長嘅嘢。
見到我呢幅大作，所有巴打都應好有勇氣嘗試啦係咪？
睇嚟我以後可以自己畫插畫。
PS：仲有好多的，有冇人想睇？
------------------------
*最新出版：《最後一分鐘－愛情》各大書局現已有售
喜歡的話like我的page，會有更多故事及散文
FB: 莎比亞
*** 八卦先好ADD嘅私人FB AC: sapeiar ***
Follow IG睇獨家sweet相: sapeiar
Search